Noticias

Para leerlo en castellano, queremos invitarle a utilizar el traductor neuronal que el Gobierno Vasco ha puesto al servicio de la ciudadanía: Aquí

El ayuntamiento dispone de versiones en castellano de sus publicaciones periódicas. Se pueden recibir pidiéndolo a la dirección: oiartzun@oiartzun.eus

Oiartzungo Udalak lehen sektorea indartzera bideratutako laguntza programa jarri du berriz martxan. 50.000 euro banatuko ditu aurten ere herriko nekazari eta abeltzainen artean, urtean zehar izan dituzten gastuak ordaintzen laguntzeko. Tokiko ekoizleen jarduera ekonomikoa sendotzen eta sektoreak bizi duen egoera zailari arnasa ematen lagundu nahi du udalak dirulaguntza lerro honekin. Sektorearen jarraipena eta iraunkortasuna bermatzen saiatu nahi du.

Laguntzak ustiategiaren tamainaren eta aurkeztutako gastuen arabera banatuko dira. Aurten bada berritasun bat: 3.000 eurora arteko laguntza jaso ahal izango da. Iaz gehienez ere 2.000 euro jaso zitezkeen; aurten, 3.000 €. Laguntza minimoa 1.000 eurokoa da aurten ere.  

Gastuak eta inbertsioak finantzatzeko laguntza

Deialdi honen bidez 2026 urtean zehar sortutako gastuak eta egindako inbertsioak estaltzeko aukera izango dute profesionalek, besteak beste:

• Ustiategietan egindako inbertsioak eta hobekuntzak
• Makineria eta ekipamendu berriak erostea
• Baratze eta lorezaintza intentsiborako azpiegiturak
• Aire libreko baratzeak jartzeko instalazio finkoak
• Berrikuntza teknologikoa edo belaunaldi erreleboa sustatzeko azterketak eta aholkularitza lanak
• Ekoizpen ekologikoa sustatzeko proiektuak
• Nekazaritza erabilerarako ura ordaintzeko gastuak
• Albaitaritza zerbitzuei lotutako gastuak
• Emakumeak lehen sektorean aritzeko proiektuak eta ekintza planak
• Lur abandonatuetan jarduera berreskuratzeko lanak
• Baserritarren lan baldintzak hobetzeko ekimenak
• Ura, bazka eta pentsua ordaintzeko gastu arruntak

Laguntza lerro berri bat larrialdi klimatikoaren albo kalteei aurre egiteko

Aurten lehen aldiz, klima aldaketak eta muturreko eguraldiak sortutako egoeretara egokitzeko, haiei aurre egiteko edota sor ditzaketen kalteak ekiditeko ondorengo inbertsio eta gastuak justifikatu ahal izango dira (eskaeran espresuki adierazi behar da klima larrialdiari aurre egiteko egin direla):

• Abereen bazka eta pentsuaren beharrei aurre egitekoak
• Ur-hartuneei lotutakoak
• Estalki klimatikoei, negutegietako egokitzapenei… dagozkienak
• Larrialdi klimatikoak eragindako izurriteei aurre egiteko tratamenduei lotutakoak

Eskaerak abenduaren 1era arte aurkez daitezke, bai erregistro elektronikoaren bidez bai Herritarren Arreta Zerbitzuan. Deialdiaren oinarriak, informazio xeheagoa eta aurkeztu beharrezko dokumentuak Oiartzungo Udalaren webguneko iragarki taulan kontsultatu daitezke.

Argazkia: Arane ustiategiko Juan Luis Retegi eta Ibon Mitxelena eta Olaia Lasa udal ordezkariak.