Noticias

Para leerlo en castellano, queremos invitarle a utilizar el traductor neuronal que el Gobierno Vasco ha puesto al servicio de la ciudadanía: Aquí

El ayuntamiento dispone de versiones en castellano de sus publicaciones periódicas. Se pueden recibir pidiéndolo a la dirección: komunikazio@oiartzun.eus

Joxemari Mitxelena Axeia-rentzat izango da X. Kirol Saria. Pilotari moduan lehenbizi eta entrenatzaile eta epaile bezala ondoren, bere ibilbide luzean kirol honi emandako guztia nabarmendu nahi izan du UKABek, herriko kirol elkarteetako ordezkariak eta Udala biltzen dituen Kirol Aholku Batzordeak. 37 proposamen ezberdin jaso dira aurten eta hautagai guztien artean aukeratua dute Mitxelena saritzea.

Urriaren 31n jasoko du oroigarria, Udalak, herriko kirol klubek eta oiartzuarrek Landetxe Kultur Aretoan egingo dioten omenaldian (arratsaldeko 18:00etan izango da).

Bizitza guztia pilotari emana

Pilotaren bueltan alor ezberdinetan ibili da beti Mitxelena. Pilotari bezala zenbait urtetan Gipuzkoako txapeldun izan zen, baita ezker paretan eta trinketean ere.

Oiartzunen sortu diren pilota talde ezberdinetan ibili da: Lartaunen lehenengo (1974tik 1992ra), Oiarpen ondoren (2004tik 2010era) eta Txosten azkenik, 2010etik aurrera. Entrenatzaile lanetan aritzeaz gain, hautatzaile bezala Pilotako Euskal Selekzioarekin hainbat lorpen ditu. Besteak beste, 2017an Kolonbian jokatutako  munduko txapelketan txapeldun izan zen neskekin eta 2023 Alziran jokatutako munduko txapelketan txapeldun neskekin eta txapeldunorde mutilekin.

Euskal herriko eta Gipuzkoako txapelketak antolatzen aritu da urteetan zehar. Epaile lanetan ere ibiltzen da urtero 80 partidu baino gehiagotan. Azken urteetan, Txostekin joko zuzenak berreskuratzen aritu da. Gaur egun, Euskadiko Euskal Pilota federazioko presidentea da eta gure herriko izena hamaika txokotara zabaldu du.

Bere pilotaren inguruko jakintza herriarekin elkarbanatu nahi izan du beti liburuak idatziz zein telebista programetan. Oiartzun herria eta pilotaren sustapena lau haizetara zabaldu ditu eta bere hitzetan Euskal Herriko plazarik onena Oiartzungo Beheko Plaza da.