Udal berriak

Herritar etorri berriei euskarara hurbil daitezen gonbita egiteko sentiberatze lanketa abian da.

Beste herrialde batzuetatik Oarsoaldera bizitzera etorritako herritar berriak euskarara gerturatzeko eta ongi etorriak senti daitezen, sentiberatzeko kanpaina abiatu dute Oiartzungo eta eskualdeko gainontzeko udalek.

Oarsoaldeko Euskara Batzordeak koordinaturiko kanpaina honek herritar berriek, euskararanzko urrats bat egin dezaten bilatzen du, nork bere errealitatetik eta zirkunstantzietatik, herriaren bizitzan behar bezala murgiltzeko eta bide berriak irekitzeko.

Bakoitzak ikusiko du nola eta noraino hurbildu nahi duen euskarara; hitz solteak eta agurrak ikasiz, seme-alabak euskal ereduan eskolatuz, bere saltokian euskararen presentzia bermatuz, elkarrizketa laburrak egiteko adina ikasiz, kultur eskaintzetara joanez… Bide zabal eta anitza eskaintzen die gure eskualdeak bertara etorritako pertsona horiei. Kanpaina honek euskara euren promozio sozialerako elementu gisa aurkezten die. Bakoitzak bere unean uneko ahalmenetik euskara kontuan izan dezan lortu nahi dute, euskararen komunitateko kide izatera gonbidatzen ditu.

Oarsoaldea anitza da, elkartasun osoz jokatu nahi dugu bertara etortzen diren bizilagun berriekin, elkarbizitza eta herritarren arteko ezagutza indartuz eta beti ere euskara bidelagun.