Udal berriak

Oiartzun ibaiaren Ugaldetxoko zati bat garbidu du Udalak Ugaldetxon: Atamitxetik hasita, Kalexa plazaren atzealdea, bidegorria... ibaiaren bi aldeak eta inguruak, ia kilometro bateko eremuan. 

Garbiketan gisa guztietako hondakinak jaso dira: pneumatikoak, erosketa orga, egur paleak, musukoak, latak, rafiazko poltsak... Guztira, 448,5 kilo hondakin bideratu dira Talaiako garbigunera, egoki birziklatu eta kudeatzeko.

Ugaldetxo beste eremu batean (Astigarraga bidean, Añarreko sarreran) eta Gurutzen (Lanbarrenen, Alkotz errekaren inguruan) ere hondakinak jaso dira.

Itsaso heltzen den hondakinen %80 ibai, erreka eta lurreko naturguneetatik heltzen da. Hori dela eta, Udalak, tarteka, erreka garbiketak egiten ditu (Urzainen bidez egingo ditu lan horiek 2022 urte osoan). Hala ere, herritarron ardura da gure ingurua txukun mantentzea eta errekak zabortegi ez bihurtzea. Errekak garbi mantentzea, guztion osasunarentzako onuragarria da.