Udal berriak

150.000 € bideratuko dira COVID19arengatik itxita egon behar izan duten establezimenduak laguntzera

Ezohiko udalbatzarra egin du gaur Oiartzungo Udalak, COVID19aren ondorioz itxita egon behar izan duten txikizkako merkataritza, ostalaritza eta zerbitzu establezimenduentzako dirulaguntzen oinarriak onartzeko.

Oiartzunen dauden merkataritza, ostalaritza eta zerbitzu establezimenduek eskatu ahal izango dute laguntza. Kontzeptu ezberdinak lagunduko ditu Udalak: errenta, aholkularitza, berriz irekitzeko egin beharreko moldaketen gastuak, aseguruak, udaberri/udako salgaien gastua...

Oraingoz, 150.000 € bideratu ditu Udalak laguntza horietara. Hala ere, Jexux Leonet alkateak azaldu duenez "kopuru hori handitu daiteke, eskaeraren arabera".

Ahobatez onartu da dirulaguntzen lerro hau. Gipuzkoako Buletin Ofizialean argitaratzen denetik, 15 egun izango dituzte eskaerak egiteko Oiartzungo merkataritza, ostalaritza eta zerbitzu establezimenduek.