Udal berriak

Otsailaren 2an jaitsiko dira, hiru egunez Oiartzungo txoko guztiak astintzeko.

Heldu dila, heldu dila! Otsailaren 2an jaitsiko dira Intxixu eta Basandreak Kataxulotik. Herriko plazan sorginekin elkartu, Udaletxea hartu eta hiru egunez Oiartzungo txoko guztietara zabalduko dute festa.

Urteko asteburu berezieneko egitarauaren berri eman du Ihote Taldeak. Luze jo du esperoak, baina badatoz. Otsailaren 2an hasiko da festa. 16:45ean Ihoteei deia egiteko burrunba abiatuko da Beheko plazatik. 19:00etan Azeri dantza eta Sorgin dantza egin eta 19:30ak aldera iritsiko dira herriko pertsonaiarik maitatuenak. Sua piztu, auzoetako zapiekin apaindutako kanabera udaletxeko balkoian jarri eta dantza eta festa izango da nagusi. Zakuz jantzita joateko eskatu du Ihote Taldeak.

Auzoz auzo kuestazioa egingo dute larunbatean. Auzo bakoitzeko koloreko zinta besoan jarri eta 9:30etatik aurrera hasiko dira etxez etxe eta baserriz baserri dantzan. Etxeetako atariak ere erraztuko dituzte, izpiritu txarrak uxatzeko. Jasotako puskekin bazkaria egingo dute gero. Aurten ere azken urteetako marka denak hautsiko dituzte. Ehundaka lagun bilduko dira auzoetako elkarteetan eta gehienetan aspaldi bukatu ziren bazkarira joateko txartelak.

Bapo bazkaldu ondoren, 18:00etatik aurrera elkartuko dira denak Doneztebe plazako Kataxulo berezian. Ihote berbeneroak alaituko du ilunabarra.

Igandean 9:00etan txistularien diana izango da. 11:00etan karroxa eta kalejira Elizalde auzoan eta 12:00etan ihote dantza gidatuak plazan. Arratsaldean 19:00etan agurtuko dituzte datorren urtera arte Intxixu, Basandre eta Sorginak. Asteburu osoa herrian barrena ibili ondoren, Kataxulora itzuliko dira.

EGITARAUA:

OTSAILAK 2, OSTIRALA

• 16:45 Burrunbaaa! Ihoteei deia! Beheko plazako biribilgunetik
• 18:00 Txokolatada Doneztebe plazan
• 18.30 Herri dantzak
• 19:00 Azeri dantza eta Sorgin dantza
• 19:30 Intxixu, Basandre eta Sorginek plaza hartuko dute

OTSAILAK 3, LARUNBATA

• 9:00etatik aurrera auzoetan Kuestaziyua poxpolinez jantzita
• 14:30 inguru bazkaria auzo bakoitzak bere elkartean
• 18:00 auzoetan ibilitako koadrilak plazan elkartuko dira
• Ondoren, musika eta festa giroa Kataxuloko txozna inguruan.

OTSAILAK 4, IGANDEA

• 9:00 Diana txistulariekin
• 11:00 Beheko plazatik karroxa eta kalejira alaia
• 12.00 Dantza gidatuak plazan
• 19:00 Intxixu, Basandre eta Sorginei agurra
• Bukatzeko, suzko akerra.