Udal berriak

Azaroaren 4ko saiorako sarrerek balioko dute otsaileko hitzordurako.

Iragarri dute bertan behera gelditu ziren Delirium Tremens eta Zurrounk taldeen kontzertuen data berria: otsailaren 17an izango da, 22:30etik aurrera Landetxe Kultur Aretoan. Sarrerak salgai daude dagoeneko, sarrerak.oiartzun.eus helbidean 12 euroan (egunean bertan 15 €).

Joan den larunbaterako zegoen aurreikusita bi talde hauen kontzertua baina bertan behera gelditu zen azkenean. Azaroaren 4rako sarrerek otsailerako balioko dutela adierazi du Udalak. Hala ere, azarorako erosi zuen norbaitek otsaileko kontzertua joateko aukerarik ez badu dirua itzultzeko eskatu dezake. Bi modutara egin daiteke: sarrerak@oiartzun.eus helbidera idatzita edo Landetxeko leihatilan bertan, astelehenetan 17:30etik 19:00etara.

Euskal rockaren bigarren kolpearekin batera sorturiko taldea da Delirium Tremens. 1991. urtean desegin zen arren, 2022an eszenatokietara itzuli ziren ‘Hordago’ izeneko disko berriarekin. Azken hilabeteetan kontzertuak eskaintzen ibili dira Euskal Herrian zein Espainiar Estatuan. Otsailaren 17an herrian egingo dute emanaldia, Zurrounk talde oiartzuarrarekin batera.