Udal berriak

Hiru egoitzatan banatuta hartuko ditu 110 haur

Urmendi Haur Eskolan aste honetan hasi da 2020/2021 ikasturtea (asteartean irakasle eta sukaldarientzat, eta atzo haur eta familientzat). Ikasturte hasiera honetan 110 haur jasoko ditu udal ikastola partzuergoak. Hauen heziketaren ardura izango dute 18 irakaslek eta hiru sukaldarik.

Hiru egoitzatan banatuta emango du zerbitzua herriko 0-3 udal zentroak ikasturte honetan: Urmendiko egoitza nagusian (Maria Garaiar plazan), Haurtzaro Ttikin eta Arri-gainen. 

COVID19ak eragin duen osasun larrialdi egoera dela eta, neurri bereziak hartu dituzte Urmendin ere. Aurreko ikasturte bukaeran ere ireki zituen ateak haur eskolak, eta orduko neurriak mantenduko dira oro har.